Welcome to ED (Karen)
တၢ်တူၢ်လိာ်မုာ်ဆူ ED
Wanju wanju, nidja
ပသ့ၣ်ညါပာ်ပနီၣ် Noongar ထံကီၢ်အ Whadjuk ပှၤကလုာ်, လီၢ်ကဝီၤလၢပမၤတၢ်လၢအပူၤအံၤ အမိၢ်လုၢ်ပၢ်လၢ်ပှၤပၢၤန့ၢ်သါတၢ်တဖၣ် ဒီး ပဟ့ၣ်တၢ်ယူးယီၣ်ပာ်ကဲဆူ မိၢ်ပၢ်ဖံဖုလၢပျၢၤဒီးအခဲအံၤတဖၣ်လီၤ.
ဖၢး(သ)ဖိသၣ်တၢ်ဆါဟံၣ် (Perth Children’s Hospital) န့ၣ် တၢ်ကိးစ့ၢ်ကီးအီၤလၢ PCH န့ၣ်လီၤ. ဂ့ၢ်ဂီၢ်အူဝဲၤကျိၤ (Emergency Department) န့ၣ် တၢ်ကိးစ့ၢ်ကီးအီၤလၢ ED န့ၣ်လီၤ.
ပအိၣ်ဖဲအံၤ ဒ်သိးကမၤစၢၤနဖိ လၢကဒိးန့ၢ်ဘၣ် တၢ်အံးထွဲကွၢ်ထွဲလၢအလိၣ်ဝဲတဖၣ်န့ၣ်လီၤ.
ပအံးထွဲကွၢ်ထွဲ ဖိသၣ်လၢအသးအိၣ် 15 နံၣ် မ့တမ့ၢ် ဆူအဖီလာ် လၢအလိၣ်ဘၣ် ကသံၣ်ကသီတၢ်ကူစါယါဘျါ မ့တမ့ၢ် လၢအိၣ်ဒီး နီၢ်သးဆူၣ်ချ့ ဂ့ၢ်ဂီၢ်အူတၢ်အိၣ်သးတဖၣ်န့ၣ်လီၤ. လၢအီးစထြ့လံယါဖိကီၢ်ဖိ မ့တမ့ၢ် ပှၤအိၣ်ဆိးလၢအီးစထြ့လံယါထံကီၢ်အပူၤတဖၣ်အဂီၢ် တၢ်လၢာ်ဘူၣ်လၢာ်စ့ၤတအိၣ်ဘၣ်.
အဝဲသ့ၣ်မ့ၢ်အိၣ်ဒီး ဆူၣ်ချ့တၢ်အိၣ်သးလၢအကဲထီၣ်ဆိတ့ၢ်လံအသးလၢညါ ဒီးမ့ၢ်ဒိးန့ၢ်ဘၣ်ဒံး တၢ်အံးထွဲကွၢ်ထွဲဖဲ PCH ဒီး လၢဆူၣ်ချ့တၢ်အိၣ်သးတမံၤဃီအဂီၢ် မ့ၢ်လဲၤဆူ ED အဃိ, တၢ်ထုးထီထီၣ်အီၤဆူ သးနံၣ် 18 နံၣ် သ့ဝဲန့ၣ်လီၤ.
နမ့ၢ်တနၢ်ပၢၢ်အီၤ မ့တမ့ၢ် ဒ်သိးကမၤစၢၤနၤလၢကတဲသကိးတၢ်ဒီးပှၤအဂီၢ်, ဃ့ထီၣ်ဘၣ် ပှၤတဲကျိးထံတၢ်တဂၤတက့ၢ်. တၢ်တိစၢၤမၤစၢၤန့ၣ် တၢ်လၢာ်ဘူၣ်လၢာ်စ့ၤတအိၣ်ဘၣ်.
တၢ်အိၣ်ခိးတၢ် အဆၢကတီၢ်တဖၣ်
လၢကဒိးပၠးသးအဂီၢ် မ့ၢ်လၢဖိသၣ်ဆိးက့အါမး အိၣ်ခိးဝဲတၢ်အဃိ ဂ့ၢ်ဂီၢ်အူဝဲၤကျိၤန့ၣ် တချုးတဒးဝဲသ့န့ၣ်လီၤ. ဖိသၣ်လၢ အဆိးက့ဆူးဆါနးကတၢၢ်တဖၣ်န့ၣ် တၢ်ကကွၢ်ဆိအ၀ဲသ့ၣ်လၢညါန့ၣ်လီၤ. နမ့ၢ်ဟဲတုၤလၢ သိလ့ၣ်ဆှၢပှၤဆါန့ၣ် တၢ်ရဲၣ်လီၤဒီးတၢ်အိၣ်ခိးတၢ် အဆၢကတီၢ်တဖၣ်န့ၣ် မ့ၢ်ဒၣ်တၢ်ဒ်သိးသိးန့ၣ်လီၤ. တၢ်အိၣ်ခိးတၢ်အဆၢကတီၢ်အအါကတၢၢ်အခဲအံၤန့ၣ် နသမံသမိးကွၢ်အီၤလၢ နီၣ်သဒၢတဖၣ် (screens) အလိၤ ဖဲဒၢးအိၣ်ခိးတၢ်တဖၣ်အပူၤ သ့န့ၣ်လီၤ.
နမ့ၢ်ရဲၣ်ကျဲၤလၢကဟးထီၣ်နဲ တချုးပကူစါယါဘျါနဖိအခါန့ၣ်, ဝံသးစူၤ ဒုးသ့ၣ်ညါဘၣ်ပှၤတက့ၢ်.
လၢဂ့ၢ်ဂီၢ်အူဝဲၤကျိၤအံၤအပူၤ တၢ်မနုၤကမၤအသးလဲၣ်
တၢ်ဆၢတဲၥ်ပှၤဆါလၢတၢ်ကဘၣ်ကွၢ်ဆိအီၤ
ပှၤမၤတၢ်ဖိလၢအမၤစၢၤဆၢတဲာ် ပှၤဆါလၢတၢ်ကဘၣ်ကွၢ်ဆိအီၤတဖၣ် ကဆၢတဲာ်နဖိအတၢ်လိၣ်ဘၣ်တဖၣ်ချ့ချ့ လၢကသံၣ်သရၣ် ကကွၢ်အီၤအဂီၢ်န့ၣ်လီၤ. အဝဲသ့ၣ် ကသမံသမိးကွၢ်နဖိ ဒီး ကသံကွၢ်နၤ တၢ်သံကွၢ်စှၤကိးဘီန့ၣ်လီၤ.
တၢ်နုာ်လီၤဆူ ဂ့ၢ်ဂီၢ်အူဝဲၤကျိၤအံၤအပူၤ
မ့ၢ်ဝံၤန့ၣ် နၤဒီးနဖိ ကဘၣ်နုာ်လီၤဆူ ဂ့ၢ်ဂီၢ်အူဝဲၤကျိၤအံၤအပူၤ ဆူဒၢးဖိ မ့တမ့ၢ် ဒၢးအိၣ်ခိးတၢ်တဖျၢၣ် အပူၤန့ၣ်လီၤ. စရ့တဂၤ ကသံကွၢ်နၤ တၢ်သံကွၢ်စှၤကိးဘီန့ၣ်လီၤ. တချုးဒိးပၠးသးလၢကသံၣ်သရၣ်အခါ ဘၣ်သ့ၣ်သ့ၣ် တၢ်အိၣ်ခိးတၢ် ကအိၣ်ဝဲန့ၣ်လီၤ. နမ့ၢ်ဘၣ်ကိၢ်ဘၣ်ဂီၤတၢ်လၢ နဖိအတၢ်အိၣ်သးကနးထီၣ်န့ၣ် ဝံသးစူၤ ဒုးသ့ၣ်ညါဘၣ်ပှၤတက့ၢ်.
ဖဲနအိၣ်ခိးတၢ်အဆၢကတီၢ်အခါ, မ့ၢ်သ့န့ၣ်, ဆိကမိၣ်ပာ် တၢ်စံးဆၢတဖၣ် လၢတၢ်သံကွၢ်လၢလာ်တဖၣ်အံၤအဂီၢ်တက့ၢ်.
|
ဘၣ်မနုၤနဖိအံၤ ဟဲဆူတၢ်ဆါဟံၣ် တနံၤညါအံၤလဲၣ်.
|
- တၢ်အံၤကဲထီၣ်အသး ယံာ်တ့ၢ်လံထဲလဲၣ်. နဆိကမိၣ် တၢ်အံၤကဲထီၣ်အသး လၢမနုၤ အဃိလဲၣ်. မ့ၢ်တၢ်အံၤကဲထီၣ်တ့ၢ်လံအသး လၢညါတဘျီဘျီဧါ.
- မ့ၢ်နဖိတူၢ်ဘၣ် တၢ်ဆါအ့ၣ်စိၢ်အ့ၣ်ထုးဧါ.
- မ့ၢ်နဖိ အီၣ်တၢ်/အီတၢ်အထံအနိ/လဲၤဆူ တၢ်ဟးလီၢ် ဧါ.
- လၢတၢ်ဂ့ၢ်ကီအံၤအဂီၢ် မ့ၢ်နလဲၤဒိးပၠးအီၤဒီး ကသံၣ်သရၣ်အဂၤ တဘျီဘျီဧါ.
- မ့ၢ်ပှၤတဂၤဂၤတဲနၤလၢ နကဘၣ်လဲၤဆူ ED န့ၣ်ဧါ.
- တချုးဟဲဆူ ED အခါ မ့ၢ်တၢ်မၤ တၢ်မၤကွၢ် မ့တမ့ၢ် တၢ်ဒိကွၢ် အဲးစရ့ (x ray) တမံၤတမၠိဒံးဧါ.
|
|
နဖိအဆူၣ်ချ့ဂ့ၢ်ဝီတၢ်ကူစါယါဘျါသးလၢညါန့ၣ်မ့ၢ်တၢ်မနုၤလဲၣ်.
|
- အခဲအံၤ မ့ၢ်အဝဲဒိးန့ၢ်ဘၣ် တၢ်အံးထွဲကွၢ်ထွဲလၢ ဆူၣ်ချ့ဂ့ၢ်ဝီ ပှၤသ့ပှၤဘၣ်တဂၤဂၤအအိၣ်ဧါ. တၢ်အံၤပၣ်ဃုၥ်စ့ၢ်ကီးဒီး နီၢ်သးတၢ်အိၣ်ဆူၣ်အိၣ်ချ့)
- တၢ်အိၣ်သး မ့တမ့ၢ် တၢ်ဆူးတၢ်ဆါ အဂုၤအဂၤ လၢအအိၣ်ဒီးအီၤ အခဲအံၤတဖၣ် မ့ၢ်မနုၤလဲၣ်. (လၢဖိသၣ်ဆံးဖိတဖၣ်အဂီၢ်, ပှၤမၤတၢ်ဖိတဖၣ် ဘၣ်သ့ၣ်သ့ၣ် ကသံကွၢ် တၢ်အိၣ်ဖျဲၣ်အဂ့ၢ်အကျိၤ)
- အပူၤကွံာ် တၢ်အိၣ်သး, တၢ်ဆူးတၢ်ဆါ မ့တမ့ၢ် တၢ်ကူးကွဲးယါဘျါတၢ် လၢအအိၣ်ဒီးအီၤတဖၣ်န့ၣ် မ့ၢ်တၢ်မနုၤလဲၣ်.
- မ့ၢ်အတၢ်ဆဲးကသံၣ်ဒီသဒၢတဖၣ်န့ၣ် ချုးဆၢချုးကတီၢ်ဧါ.
- အပူၤကွံာ် ဟံၣ်ဖိဃီဖိ ဆူၣ်ချ့တၢ်အိၣ်သး မ့တမ့ၢ် တၢ်ဆူးတၢ်ဆါ အဂ့ၢ်အကျိၤ လၢနသးအိၣ်ဒုးသ့ၣ်ညါပှၤ မ့ၢ်အိၣ်တမံၤမံၤဧါ.
|
|
အခဲအံၤ မ့ၢ်နဖိစူးကါ ကသံၣ်ကသီမနုၤတဖၣ်လဲၣ်.
|
- ဖဲအပူၤကွံာ်စှၤကိးသီအပူၤ ကသံၣ်ကသီတဖၣ်လၢ အဝဲစူးကါတ့ၢ်လံဝဲတဖၣ် (ပာ်ဃုာ်ဒီး ကသံၣ်မၤသံတၢ်ဆါဃၢ်တဖၣ်) န့ၣ် မ့ၢ်တၢ်မနုၤလဲၣ်.
- ကသံၣ်န့ၣ်အမံၤဒ်လဲၣ်, ကသံၣ်တအီအဂီၢ်န့ၣ်မ့ၢ်ထဲလဲၣ် ဒီးတၢ်စူးကါညီနုၢ်အီၤပှဲၤအံၤပှဲၤဘျီလဲၣ်.
- ကသံၣ်ဟ့ၣ်အါထီၣ်ဂံၢ်ဘါ, ကသံၣ်ဘံၣ်တၣ်မံၣ်, မ့တမ့ၢ် သ့ၣ်ဂံၢ်ဝၣ်စဲ လၢအဝဲအီအခဲအံၤတဖၣ်, မ့တမ့ၢ် လၢအဝဲအီညီနုၢ်တဖၣ် မ့ၢ်တၢ်မနုၤလဲၣ်.
- ကသံၣ်လၢအပတုာ်ကွံာ်ဝဲ လၢတယံာ်ဒံးဘၣ်အပူၤ မ့ၢ်အိၣ်တမံၤမံၤဧါ.
|
|
တၢ်လၢတဖိးလိာ်သးဒီးသွံၣ်ထံတဖၣ် လၢအအိၣ်ဒီးနဖိန့ၣ် မ့ၢ်တၢ်မနုၤလဲၣ်.
|
- တၢ်အံၤပာ်ဃုာ်ဒီးတၢ်ခီဆၢထီၣ်တၢ်တဖၣ်ဆူ တၢ်အီၣ်တၢ်အီ, ကသံၣ်ကသီ, တၢ်ဖိဃၢ်ဆဲးတၢ်, ဒီး တၢ်ဖိတၢ်လံၤတဖၣ် ဒ်အမ့ၢ် ရၢးဘၢၣ်အထုး (latex) မ့တမ့ၢ် တၢ်ကူတၢ်သိးတဖၣ်လီၤ (ဘၣ်သ့ၣ်သ့ၣ်ကမ့ၢ်ဝဲ တၢ်လၢတၢ်သ့ၣ်ညါလီၤတံၢ်အီၤ မ့တမ့ၢ် တၢ်သးဒ့ဒီအီၤတဖၣ်လီၤ).
|
|
တၢ်လၢနဆိကမိၣ်လၢ ပကြၢးသ့ၣ်ညါအီၤ မ့ၢ်အိၣ်တမံၤမံၤဧါ.
|
- ဘၣ်ထွဲဒီး တၢ်အံးထွဲကွၢ်ထွဲ အတၢ်အိၣ်ဆူၣ်အိၣ်ချ့ မ့တမ့ၢ် တၢ်ကူစါယါဘျါအီၤန့ၣ် မ့ၢ်နဖိတူၢ်ဘၣ် တၢ်ပျံတီၢ်တၢ်တၢ်ဆါတမံၤမံၤဧါ.
- မ့ၢ်နၤ မ့တမ့ၢ် နဖိအိၣ်ဒီး တၢ်ဆဲးတၢ်လၤ, တၢ်ဘၣ်ထွဲရ့လိာ်သး, ကျိာ်, ဟံၣ်ဖိဃီဖိ မ့တမ့ၢ် သကဲာ်ပဝး တၢ်လိၣ်ဘၣ်တမံၤမံၤဧါ.
- အလီၢ်ခံကတၢၢ်တဘျီဖဲ နဖိအိၣ်ဒီးတၢ်တမံၤမံၤလၢ ကအီၣ်ဝဲ မ့တမ့ၢ် ကအီဝဲန့ၣ် မ့ၢ်အခါဖဲလဲၣ်.
|
ဘၣ်တၢ်ကွၢ်အီၤလၢ နၢးစ် မ့တမ့ၢ် ကသံၣ်သရၣ်
အဝဲသ့ၣ် ကသံကွၢ် တၢ်သံကွၢ်တဖၣ် ဒီး ကသမံသမိးကွၢ်နဖိ ဒ်သိးကမၤစၢၤအီၤ လၢကနၢ်ပၢၢ် တၢ်မနုၤကမၤအသးအဂ့ၢ် န့ၣ်လီၤ.
နမၢကသံၣ်သရၣ် ကတိၤတၢ်ဒီးနၤ ဖဲတၢ်လီၢ်လၢ အယံၤဒီးနဖိ သ့န့ၣ်လီၤ.
ပှၤလိၣ်ဘိတဖၣ် မၢကသံၣ်သရၣ်ကတိၤတၢ်ဒီးအီၤ ဖဲတၢ်လီၢ်လၢအယံၤဒီးအမိၢ်ပၢ် သ့န့ၣ်လီၤ.
ကတိၤသကိးတၢ်ဒီး နနၢးစ် မ့တမ့ၢ် ကသံၣ်သရၣ်
ကသံၣ်သရၣ် မ့တမ့ၢ် နၢးစ် ကတဲနၢ်ပၢၢ်နၤ တၢ်ကမူၤကမၣ် ဒီး တၢ်လၢနဖိလိၣ်ဘၣ်အီၤတဖၣ်န့ၣ်လီၤ.
တဘျီဂ့ၤတဘျီဂ့ၤ သံကွၢ်ပှၤတၢ်သံကွၢ်တဖၣ် တက့ၢ်.
တၢ်မၤကွၢ်တဖၣ် ဒီး တၢ်ကူစါယါဘျါ
ဘၣ်သ့ၣ်သ့ၣ် နဖိကလိၣ်ဘၣ် တၢ်မၤကွၢ်သွံၣ်, တၢ်ဒိကွၢ်အဲးစရ့, မ့တမ့ၢ် တၢ်မၤကွၢ်အဂၤတဖၣ် ဒ်သိးကဃုထံၣ် တၢ်ကမူၤကမၣ်တဖၣ် လီၤ. ဖဲအအိၣ်လၢ ED အဆၢကတီၢ်အခါ, ဘၣ်သ့ၣ်သ့ၣ် အဝဲကဒိးန့ၢ်ဘၣ် တၢ်ကူစါယါဘျါစ့ၢ်ကီးန့ၣ်လီၤ. ဘၣ်သ့ၣ်သ့ၣ် ကလိၣ်လၢ နကဘၣ်အိၣ်ခိး တၢ်မၤကွၢ်အစၢတဖၣ် မ့တမ့ၢ် ခိးကွၢ် နဖိအတၢ်ခီဆၢထီၣ် တၢ်ကူစါယါဘျါန့ၣ်လီၤ.
တၢ်က့ၤဆူဟံၣ် မ့တမ့ၢ် တၢ်ထီၣ်တၢ်ဆါဟံၣ်
သန့ၤထီၣ်သးလၢနဖိအတၢ်အိၣ်သးအဖီခိၣ်, ဘၣ်သ့ၣ်သ့ၣ် နကဘၣ်က့ၤဆူဟံၣ်, အိၣ်ဖဲန့ၣ်ယံာ်ယံာ် လၢကသံၣ်သရၣ် ကကွၢ်ထံကွၢ်ဆးနဖိအဂီၢ်, မ့တမ့ၢ် ထီၣ်တၢ်ဆါဟံၣ်န့ၣ်လီၤ.
တၢ်က့ၤဆူဟံၣ်
ဖဲနဖိက့ၤဆူဟံၣ်သ့တကီၢ်ခါန့ၣ်, ကသံၣ်သရၣ် မ့တမ့ၢ် သရၣ်/သရၣ်မုၣ်ကွၢ်ပှၤဆါ ကဟ့ၣ်လီၤနၤ တၢ်ဂ့ၢ်တၢ်ကျိၤဘၣ်ဃး တၢ်လၢနလိၣ်မၤအီၤတဖၣ် လၢကအံးထွဲကွၢ်ထွဲနဖိအဂီၢ်န့ၣ်လီၤ. တၢ်အံၤကပာ်ဃုာ်ဒီး တၢ်ဂ့ၢ်တၢ်ကျိၤအလံာ်က့တခါ ဘၣ်ဃးဒီး နဖိအတၢ်အိၣ်သး ဒီး လံာ်ပရၢတဘ့ၣ် လၢနလီၢ်ကဝီၤကသံၣ်သရၣ်အဂီၢ်န့ၣ်လီၤ. နၤ မ့တမ့ၢ် နဖိ မ့ၢ်လိၣ်ဘၣ် ကသံၣ်ကသီတၢ်ကူစါယါဘျါ အလံာ်အုၣ်သးတခါန့ၣ်, ဝံသးစူၤ ဒုးသ့ၣ်ညါဘၣ် နကသံၣ်သရၣ် မ့တမ့ၢ် နၢးစ် တချုးနဟးထီၣ်အခါတက့ၢ်. တၢ်သံကွၢ်မ့ၢ်အိၣ်ဒီးနၤတမံၤမံၤန့ၣ် သံကွၢ်ဘၣ်ပှၤတက့ၢ်.
ဖဲနအိၣ်လၢဟံၣ်အခါ, ဝံသးစူၤလူၤပိာ်မၤထွဲ တၢ်နဲၣ်လီၤလၢ ကသံၣ်သရၣ်ဟ့ၣ်လီၤနၤတဖၣ် တက့ၢ်. နမ့ၢ်သူၣ်ကိၢ်သးဂီၤလၢ နဖိတကိညၢ်ထီၣ်က့ၤအဂ့ၢ်န့ၣ်-
တၢ်ဒုးထီၣ်တၢ်ဆါဟံၣ်
ဘၣ်သ့ၣ်သ့ၣ် တၢ်ကဒုးထီၣ်နဖိတၢ်ဆါဟံၣ် လၢတၢ်မၤကွၢ် ဒီး/မ့တမ့ၢ် တၢ်ကူစါယါဘျါ ဆူညါတဖၣ်အဂီၢ် လၢဂ့ၢ်ဂီၢ်အူကရူၢ် မ့တမ့ၢ် လၢကသံၣ်သရၣ်သ့ဘၣ်လီၤဆီ အတၢ်ကွၢ်ထွဲအဖီလာ်န့ၣ်လီၤ. ပတၢ်ပညိၣ်န့ၣ်မ့ၢ်ဒ်သိးကဟ့ၣ်လီၤ တၢ်အံးထွဲကွၢ်ထွဲ လၢအအိၣ်ဘူးဝဲဒီးနဟံၣ်န့ၣ်လီၤ. အန့ၣ်သတးဒီး ပဆှၢခီ နဖိအံၤဆူ တၢ်ကွၢ်ထွဲဖိသၣ်ပှၤဆါအဒၢး ဖဲနလီၢ်ကဝီၤတၢ်ဆါဟံၣ် မ့တမ့ၢ် လၢကဟ့ၣ်လီၤ တၢ်အံးထွဲကွၢ်ထွဲ ဒီး ကသမံသမိးကွၢ်နဖိအဂီၢ် ပဟ့ၣ်လီၤနၤ တၢ်ဆါဟံၣ်လၢဟံၣ်ပူၤ (Hospital in the Home, HiTH) နၢးစ်တၢ်လဲၤထံၣ်လိာ်သးတဖၣ် ကသ့ဝဲန့ၣ်လီၤ.
အလီၢ်မ့ၢ်အိၣ်လၢ နကဘၣ်ထီၣ်တၢ်ဆါဟံၣ်ဖဲ ဖၢး(သ)ဖိသၣ်တၢ်ဆါဟံၣ်န့ၣ် တၢ်ကသုးကွံာ်နၤလၢ ပဂ့ၢ်ဂီၢ်အူဝဲၤကျိၤ တစိၤတလီၢ်တၢ်အိၣ်ဆိးဝဲၤဒ့ (ESSU) မ့တမ့ၢ် တၢ်ဆါဟံၣ်ဒၢးအပူၤန့ၣ်လီၤ.
တၢ်မ့ၢ်ဒုးနုာ်လီၤနဖိဆူ ESSU န့ၣ်, အဝဲကဘၣ်အိၣ်လၢ ဂ့ၢ်ဂီၢ်အူကရူၢ် အတၢ်အံးထွဲကွၢ်ထွဲအပူၤန့ၣ်လီၤ. အလီၢ်မ့ၢ်အိၣ်လၢ နဖိကဒိးန့ၢ်ဘၣ် တၢ်ကူစါယါဘျါတၢ် မ့တမ့ၢ် တၢ်ကူးကွဲယါဘျါတၢ် ဆူညါန့ၣ်, တၢ်ကတူၢ်လိာ်အီၤဆူ တၢ်ဆါဟံၣ်ပှၤဆါဒၢးအပူၤန့ၣ်လီၤ.
ထံၣ်လိာ်သးဒီး နဆူၣ်ချ့တၢ်ကွၢ်ထွဲအကရူၢ်
ပှၤအိၣ်ဝဲဒၣ်အါမးလၢ အမၤစၢၤအံးထွဲကွၢ်ထွဲ နဖိအံၤန့ၣ်လီၤ.
ပအိၣ်ဒီး Aboriginal ဆူၣ်ချ့ဂ့ၢ်ဝီ ပှၤမၤတၢ်ဖိ လၢအအံးထွဲကွၢ်ထွဲစၢၤတၢ် လၢ ED အပူၤ ဖဲမုၢ်ခီၣ်ထံးပူၤဆူမုၢ်ယဲၢ်နံၤ အါတက့ၢ်အပူၤန့ၣ်လီၤ. နမ့ၢ်အဲၣ်ဒိးထံၣ်လိာ်သးဒီးအဝဲသ့ၣ်န့ၣ် ဝံသးစူၤဃ့ထီၣ်အီၤတက့ၢ်.
နဖိမ့ၢ်တူၢ်ဘၣ် တၢ်ဆါအ့ၣ်စိၢ်အ့ၣ်ထုးန့ၣ်
ဝံသးစူၤတဲသကိးတၢ်ဒီး နၢးစ်တဂၤတက့ၢ်. အဝဲကသမံသမိးကွၢ် နဖိ ဒီး ကဟ့ၣ်လီၤဝဲ ကသံၣ်မၤကိညၢ်ထီၣ်တၢ်ဆါန့ၣ်လီၤ.
မ့ၢ်နဘၣ်ကိၢ်ဘၣ်ဂီၤလၢ နဖိအတၢ်ဆါနးထီၣ်ဧါ. လိၣ်လၢပကဘၣ်သ့ၣ်ညါ
နဖိအံၤမ့ၢ်ဖျါလၢ အတၢ်ဆါနးထီၣ် မ့တမ့ၢ် တမၤအသးဒ်ညီနုၢ်အသိးဘၣ်ဒီး, ဝံသးစူၤဒုးသ့ၣ်ညါပှၤ တဘျီဃီတက့ၢ်. နသ့ၣ်ညါနဖိအဂ့ၢ်အကျိၤ အဂ့ၤကတၢၢ်လီၤ. ပကဒိကနၣ်နၤန့ၣ်လီၤ.
မ့ၢ်...
တၢ်ဟးလီၢ်တဖၣ် အိၣ်ဖဲလဲၣ်
- တၢ်ဟးလီၢ်န့ၣ်အိၣ်ဝဲဒၣ်ဖဲ ED အပူၤ, ဖဲကျဲစၢၤအစ့ၣ်တကပၤ
- ဆူ ED အလီၢ်ခံ, ဖဲ Pod C တၢ်အိၣ်ခိးအဒၢး အကပၤ, ဖဲတၢ်ဆါတၢ်အိတၢ်အီၣ်ကျးအလီၢ်ခံ
ဝံသးစူၤ လူၤပိာ်ထွဲ တၢ်ပနီၣ် မ့တမ့ၢ် သံကွၢ် ပှၤမၤတၢ်ဖိ နမ့ၢ်တသ့ၣ်ညါလီၤတံၢ်အဃိ
တၢ်အံးထွဲကွၢ်ထွဲဖိအဒၢး
- တၢ်လဲဖိသၣ်အကူအကၤစီၢ်နီၤခိၣ်န့ၣ် အိၣ်ဝဲဒၣ်ဖဲ ED အပူၤ, ဖဲတၢ်ဟးလီၢ်အကပၤ, လၢယၣ်ဘျးသဒၢလါအဲးအလီၢ်ခံ
- တၢ်လဲဖိသၣ်အကူအကၤစီၢ်နီၤခိၣ် ခံခါတခါန့ၣ် အိၣ်ဝဲဒၣ်ဖဲ တၢ်လုၢ်ထံဒၢးတဖျၢၣ်ဖျၢၣ်အပူၤ ဖဲ Pod C အကပၤ
ထံအီအထံထီၣ်ပၢၤတဖၣ် (Drink fountains)
ထံအိၣ်ဝဲဒၣ်ဖဲ တၢ်အိတၢ်အီၣ်အလီၢ် (Beverage Bay) အပူၤ ဖဲ Pod C တၢ်အိၣ်ခိးအလီၢ် အကပၤန့ၣ်လီၤ.
တၢ်အီၣ်ဒီးတၢ်အီ
- လၣ်ဖးထံဒီးခီဖံၣ် အတၢ်ပီးတၢ်လီ အကလီတဖၣ်န့ၣ် အိၣ်ဝဲဒၣ်ဖဲ တၢ်အိတၢ်အီၣ်အလီၢ် လၢ ED အပူၤ ဖဲ Pod C တၢ်အိၣ်ခိးအလီၢ် အကပၤန့ၣ်လီၤ
- စဲးဆါတၢ်အီၣ်တၢ်အီတဖၣ် (vending machines) အိၣ်ဝဲဒၣ်ဖဲ ED အချၢ ဖဲစဲးဃီသွါလါလါတဖၣ် (Green lifts) တကပၤန့ၣ်လီၤ
- Little Lion တၢ်အီၣ်ကျး န့ၣ်အိၣ်ဝဲဒၣ်ဖဲ ကျဲစၢၤမိၢ်ပှၢ်အကပၤ ဟီၣ်ခိၣ်အကထၢ (Ground Level) န့ၣ်လီၤ
- တၢ်အီၣ်တၢ်အီအဘျီၣ် န့ၣ်အိၣ်ဝဲဒၣ်ဖဲ တၢးတကထၢ (Level 1), တၢ်တုၤအိၣ်အီၤသ့ခီဖျိ စဲးဃီသွါဂီၤစၢ်တဖၣ် (Pink lifts) မ့တမ့ၢ် ဃီသွါတဖၣ် လၢအိၣ်ဖဲ Little Lion တၢ်အီၣ်ကျး ဖဲဟီၣ်ခိၣ်အကထၢန့ၣ်လီၤ
- ပနံာ်ရိကျးဆံးဆံးဖိ , Xpress Zone, န့ၣ်အိၣ်ဝဲဒၣ်ဖဲ QEII တၢ်ပတုာ်သိလ့ၣ်အလီၢ် အတၢ်သူၣ်ထီၣ်အဖီလာ်တကထၢ ဒီး တၢ်အိးထီၣ်အီၤဖဲ မုၢ်ခီၣ်ထံးပူၤ တုၤဆူ မုၢ်ဃုနံၤ, ဂီၤ 7 နၣ်ရံၣ် တုၤဆူ ဟါ 8 နၣ်ရံၣ်န့ၣ်လီၤ.
ကမျၢၢ်အလီတဲစိတဖၣ်
အိၣ်ဝဲဒၣ်ဖဲ ED အချၢ ဖဲကျဲဘၢၣ်စၢၤ လၢဘျးစဲဃာ် ED ဆူ တၢ်ဆါဟံၣ်န့ၣ်လီၤ.
ATM
အိၣ်ဝဲဒၣ်ဖဲ ED အချၢ ဖဲကျဲဘၢၣ်စၢၤ လၢဘျးစဲဃာ် ED ဆူ တၢ်ဆါဟံၣ်န့ၣ်လီၤ.
တၢ်ပူၤတၢ်ဖျဲးဒီးတၢ်ဘံၣ်တၢ်ဘၢ
နတၢ်ပူၤတၢ်ဖျဲးဒီးတၢ်ဘံၣ်တၢ်ဘၢန့ၣ် မ့ၢ်တၢ်လၢအကါဒိၣ်မး လၢပဂီၢ်န့ၣ်လီၤ. နမ့ၢ်ထံၣ်ဘၣ် သကဲာ်ပဝး လၢအမၤဘၣ်ယိၣ်ဘၣ်ဘီနၤ တမံၤမံၤ, မ့တမ့ၢ် နမ့ၢ်တူၢ်ဘၣ်လၢ တၢ်အံၤ ကမၤဘၣ်ဒိဘၣ်ထံး နဖိအတၢ်ပူၤဖျဲးဘံၣ်ဘၢန့ၣ်, ဝံသးစူၤ ဆဲးကျိးဆဲးကျၢဘၣ် ပှၤမၤတၢ်ဖိတဂၤဂၤ မ့တမ့ၢ် PCH ဘံၣ်ဘၢဖိ လၢ 6456 3003 တဘျီဃီ တက့ၢ်.
တၢ်တဝံသးစူၤတၢ်မၤတရီတပါနီတစဲး
လၢကမၤလီၤတံၢ် ပှၤကိးဂၤ အတၢ်ပူၤဖျဲးဘံၣ်ဘၢအဂီၢ်, ပအိၣ်ဒီး တၢ်တဝံသးစူၤတၢ်နီတစဲး အသနူ လၢတၢ်မၤတရီတပါတၢ် ဒီး တၢ်ဃုဆိတၢ်အ့ၣ်လိာ်ဆိးက့ အဂီၢ်န့ၣ်လီၤ.
ပှၤလၢ အမၤတရီတပါတၢ် မ့တမ့ၢ် ဃုဆိတၢ်အ့ၣ်လိာ်ဆိးက့ လၢနီၢ်ခိတၢ်ဟူးတၢ်ဂဲၤ မ့တမ့ၢ် တၢ်စံးတၢ်ကတိၤ တဂၤလၢ်လၢ်န့ၣ် တၢ်ကမၢအဟးထီၣ်ကွံာ် တဘျီဃီ ဒီး မ့ၢ်လိၣ်အဃိန့ၣ် တၢ်ကကိးဘံၣ်ဘၢဖိန့ၣ်လီၤ.
တၢ်ဒိတၢ်ဂီၤတဖၣ် မ့တမ့ၢ် တၢ်ဒိတၢ်ဂီၤမူ
ဖဲနအိၣ်လၢ PCH အဆၢကတီၢ်အခါ, လၢပပှၤဆါတဖၣ်, ဟံၣ်ဖိဃီဖိတဖၣ်, ပှၤအံးထွဲကွၢ်ထွဲတၢ်တဖၣ် ဒီး ပှၤမၤတၢ်ဖိတဖၣ် အနီၢ်တဂၤဂ့ၢ်ဝီခူသူၣ် ဒီး တၢ်ဂ့ၢ်တၢ်ကျိၤတၢ်ဘံၣ်တၢ်ဘၢအဂီၢ်, ဝံသးစူၤ တဘၣ်ဒိတၢ်ဂီၤတဖၣ် မ့တမ့ၢ် ဒိတၢ်ဂီၤမူ တဂ့ၤ.
တၢ်စံးထီၣ်ပတြၢၤတဖၣ် ဒီး တၢ်ပာ်ဒ့ၣ်ပာ်ကမၣ်တဖၣ်
နတၢ်ဟ့ၣ်ကူၣ်ဆၢက့ၤတၢ်တဖၣ်, ဂ့ၤမ့ၢ်ဂ့ၤ အၢမ့ၢ်ဂ့ၤ, မၤစၢၤပှၤလၢ ကဟ့ၣ်လီၤ နၤဒီးနဖိ တၢ်တိစၢၤမၤစၢၤ လၢအဂ့ၤဒိၣ်တဖၣ်လီၤ.
ဖဲနတၢ်လဲၤဒိးပၠးသးလၢ ED ဝံၤအလီၢ်ခံ, တၢ်ကဆှၢလီၤန့ၢ်နၤ လံာ်လဲၢ်တၢ်ကွဲးတခါ ဒ်သိးကဃ့ထီၣ် နတၢ်ဟ့ၣ်ကူၣ်ဆၢက့ၤတၢ် ခီဖျိ MyVisit တၢ်ဃိထံသ့ၣ်ညါန့ၣ်လီၤ. လၢကဒုးသ့ၣ်ညါပှၤ နတၢ်လဲၤခီဖျိအဂီၢ်, ဝံသးစူၤ မၤပှဲၤဘၣ် တၢ်ဃိထံသ့ၣ်ညါဖုၣ်ကိာ်ဖိအံၤ တက့ၢ်. နဟ့ၣ်ပှၤ တၢ်စံးထီၣ်ပတြၢၤ မ့တမ့ၢ် တၢ်ပာ်ဒ့ၣ်ပာ်ကမၣ် ခီဖျိ ပပှာ်ယဲၤသန့ သ့ဝဲစ့ၢ်ကီးန့ၣ်လီၤ.